我一出世就住大圍,當年仲係一條村,未有火車站!只得一架巴士出九龍(即現時嘅81號巴士線),當時我哋村內細路個個都通街玩!我只需要遵守一個守則,不可以出馬路就得,記得有一次,我當時兩三歲,夜晚六點零鐘左右,我一個人走去街市搵我阿婆,不過阿婆收咗檔,有一個年約四十歳,戴金絲眼鏡嘅地中海男人行過嚟問我:「小朋友,你喺度做乜呀?」我答:「搵我婆婆囉!」佢話「我帶你搵婆婆好唔好呀?」我答"好"之後就跟咗佢行!之後佢帶我由大圍口離開,並要橫過大埔道過對面上山(即依家嘅美林邨)當年嗰度並沒有任何過馬路設施,一定要擒欄杆先可以過馬路,就喺佢抱我擒欄嘅時候,啱啱有一部巴士由九龍返到大圍,我印象中記得,我見到好多人由巴士窗口擒咗半個身出嚟,癲晒咁鬧(當年喺大圍站落車嘅全部都係、大圍住嘅街坊,佢哋認得我,但帶住我嘅係生保人,所以知道佢係拐子佬)之後條友馬上將我抱起上膊頭,向山跑!由於我塊面向後,佢一路抱住我跑,我一路望住後面,由於好黑,我望到後面好多人影追上嚟,越追越近,之後條友掟咗我落地,我跌咗落田度,成身泥,條友跑咗上山,走咗。我之後被街坊帶返屋企,立即比阿媽打咗鑊好金嘅,當時所有街坊圍住睇嘢,冇一個出聲!之後我屋企多咗塊板閘住門口,唔比出街玩,仲連累成個大圍啲𡃁仔都唔比出街玩。我父母管教好嚴,即係打得好甘!老母打我,老豆幫阿媽拖,變合體攻擊二打人一,老豆打亦都一樣,所以逃走路線只有走出村入面嘅街市搵我阿婆同契媽救命!由屋企去街市,不到200米!只要快過我老母出到街巿,我就贏!由於當年我得兩三歲,我老母仲後生!所以多數都輸!未見到街市之前就被老媽子成功擒獲,隨即就地正法!後來自已日漸長大,漸漸開始有得摙吓!勝負因素取決於起跑距離,只要起跑時有一定距離,我就有足夠時間在被擒獲之前出到街市!所以當時我已經深切明白,贏在起跑線嘅道理!所以呢個係最有效嘅訓練,我在同年紀嘅朋友同學中,我跑得最快!亦因為打得多,我唔怕痛而且捱得!六年小學,凈係個頭,都穿咗五次!在小學其間,我當然係校中田徑隊啦!不過自己衰,玩咗半年就比老豆寫信唔比我做校隊。六年班嗰年暑假,我日日喺屋企遊手好閑,我老豆捉咗我去地盤做泥水,我老豆比$20一日我,我打算做完個暑假之後買一部同學仔讓出嚟嘅二手任天堂遊戲機,可惜我老豆拖糧,最後遊戲機買唔成,結果買咗我第一部單車!正正就係我懂事以來嘅重要轉捩點!

 

因為我有咗部單車,機動性大大提高,我要去邊度玩,唔洗撘車,踩單車去得喇!初中嗰三年,真過癮,放學放假就踩住部單車四圍去,𡃁仔有時間有禮力,所以越踩越遠。上水丶元朗丶屯門丶西貢丶尖沙咀⋯⋯慢慢丶淺水灣丶石澳,以當年十三四歲𡃁仔嘅認知,我啲同學梗係唔信啦,其實非常戇居,山長水遠踩到去元朗屯門,只係走入七仔飲杯汔水,由於冇乜錢,仲要一杯幾個人飲。呢個就係我嘅童年,喺學校跑得快,所以順理成章,中學又再入校隊,其實我唔太中意跑,悶!又辛苦!不過贏開又冇理由唔玩!所以一至五放學練跑,星期六日走出去踩單車!不過我平常出出入入,就算出街買支雪條,我都要攬住部單車!中一有位老師,帶咗我去參加當年嘅牛奶公司越野長跑比賽之後,我開始覺得,公開比賽威好多!勁好多!唔同學校嘅一年一次嘅陸運會,質素爭好遠!於是我先開始自已練跑,不過係自己亂咁跑,只係識越跑越遠!總之,一隻牛咁跑,另一邊廂,星期六日踩單車又覺得唔夠快,於是又走去超級市場做落貨賺錢,因為要轉一部可以比賽用嘅耷頭。所以我由六年班暑假開始幫老豆做$20一日起,每逢假期,我都去搵錢!由中一到中三,跑步同單車都係分開獨立玩,獨立操,攪吓攪吓,連單車都開始走去鬥車!間唔中都有機會博懵有得贏吓!到咗中三,我知我自己好似隻牛咁淨係識有咁遠跑咁遠,係唔夠,而且好多田徑比賽要有田徑會先得,咁啱有個跑友跟愉園操開,於是我自己走去,不過愉園唔收我!結果最後我入咗冇乜料到嘅沙田體育會!其實唔太差,起碼有個運動場,可以跟啲programme 自己操吓!當時最把炮係屈臣氏田徑隊,當然我好恨入啦!適逢其會,咁啱嗰年中三暑假有一個屈臣氏青少年暑期訓練班,雖然唔係正式入屈臣氏,但要求好嚴格,要選拔,雖然呢個訓練班係宣傳多,我都流晒口水!好好彩入到!呢個訓練班有好幾個教練,其中一個就係我嘅啟蒙老師,崔錦棠先生!亦係我第一次認識三項鐵人!佢見我跑得吓,又有踩單車,叫咗我去試吓三項鐵人!其實自己知自己事,單車上咗B組,啲對手好勁,好難有得贏,跑步亦一樣,出到大海,的確難好多!於是我又走去玩三項鐵人!不過玩鐵人,問題更大!第一,我游水好差,只係叫做浸唔死嗰隻,原來大部分鐵人都係游水起家,個個游得好快,第一次玩正式鐵人賽,我上水望返後面,成個海只凈返一個,我即係尾二!個場得兩部單車!其他全部走晒,我拿拿聲跳上車博命追,當時我嘅單車同跑步都比其他人強,不過到終點,我都追唔返上頭五位!慘敗!我條氣好唔順!明明我單車跑步贏佢哋咁多,但係游水輸咁多,冇得追,於是我的起心肝,週圍搵泳會收我!不過我游水太差喇!冇一間肯收我!跑步都仲話可以好似隻牛咁週圍跑,但係游水要有泳池!我自己走入去政府泳池操冇問題,不過原來係操唔到,因為太多人亂咁游,頂住晒,想正正經經咁游係游唔到嘅,最大問題係政府泳池十月尾拉閘,我唯有$25一個鐘,入體院再嚟亂咁拂!雖然冇乜明顯進步,但係都幫到啲!咁啱好年鐵人會有意本地化我知我唔夠班,就係咁,符符碌碌入咗National Squad!又有問題!我英文完全唔識,原來玩鐵人要用更多錢!鬥單車只係$20報名費,鐵人閒閒地細賽都要五舊,大賽更唔洗講啦!而且當年玩鐵人,比賽都係山卡啦地方!仲要比錢運送單車,所以我只係揀有價值玩!記得當年我要去大嶼山長沙比賽,五點起身打孖上烹兩包公仔麵對飽個肚,之後咩晒所有裝備,由大圍踩馬騮山出九龍,踩去佐敦道碼頭撘船過中環,再轉船去梅窩,再踩去長沙報到!由於路程遠,我一定要慢慢踩,留力比賽!

 

後來,當時訓練總監,Ruth Hurt發現我好多比賽唔去得,平日訓練又走去返工!所以佢括免我所有比賽報名費,仲叫我做鐵人會part time,之後我多咗好多時間練習,有份代表香港去比賽丶訓練等等!由於自己水準高咗,崔錦堂幫手,我入埋屈臣氏,不過只係陪跑,不過都好,我恨咗好耐。當年有個馬拉松比賽,由上水跑返深圳"港深馬拉松"我未夠秤,由於當時並無機制比未成年嘅參加,好煩,搞咗好多書信來往,最後比我玩,所以當時我係全場最細,跑83名次,都算唔錯!最後一提嘅係,我身邊嘅親朋戚友,個個都只係潑冷水!老竇老母更加係喊打喊剎!所以當年個非常掙扎

 

嗰幾年,我有得出國比賽丶訓練,而且日常出出入入都係跟住教練講英文,我英文進步好多而且開咗眼界!之後機緣巧合,我加入咗警隊,亦正式退出三項鐵人!其實當年考到警察都係時勢關係,今日比我再考,一定考唔到!本來都諗住當咗差可以繼續玩,點知原來係唔得嘅

出咗學堂之後,原來阿媽搞移民,全家離開香港,由於九七殺到,我阿媽梗係想我唔撈,全家走啦!不過,我唔想走,就喺見領使嘅時候,原來我仲有一個選擇,可以遲五年走!咁我就可以享受一個人喺香港嗰種自由!一個人喺香港,唔洗交租,有地方住,一份人工,自己一個人洗,嘩!仲想點?想去邊丶想玩乜丶想買乜?仲洗諗?由於返工時間完全夾唔到鐵人訓練,我玩咗 mountain bike!得閒,自己搬㗎車上山就得,而且原來行爛路,噔吓,飛jump吓,仲過癮,所以我又再敗家喺爬山單車上面,係咁買,98年,我其中一部都三萬幾,仲有其他濕濕碎碎用品!絕對貴過今日啲滑翔傘!除咗上山玩,之前做鐵人嘅時候已經職出外採單車,所以我亦好中意耐唔耐帶埋單車玩單車旅行,原來言語不通,唔識路,而又自己去到目的地嘅過程好過引(當時並沒有衛星導航),不過喺朋友眼中,有如自殺一樣!除咗週圍去,原來美國玩mountain bike有好多特別開發場地,所以我經常返美國踩單車,一年去兩三次,第一次冬天去,又再神推鬼拱,未識玩就買咗全套snowboard,一玩,又玩咗十幾年啦!

 

由於性格敗家,有個朋友撩咗我去玩滑翔傘,嘩!我一見到,即刻流晒口水!即刻捉住啲師兄問香港有冇得學,佢比咗個電話號碼我,我即刻打去,師傅比咗個戶口號碼我,人都冇見過,我就走去入錢,就係咁,我2000年開始飛!識飛之後,我返美國,當然帶傘啦!當年我凈係識去屋企附近場地飛,由於嗰個場冇人理,所以冇任何問題,後來飛咗三年,開始悶,而且屋企有車,於是走去其他場玩,不過去到因爲冇美國牌,比人趕走!於是喺美國重頭搵師父再學!當然,三唔識七,師父好嚴,少少唔得都肥我,而且我每次只係喺美國留最多三星期,我到2005年先考到p3!飛咗幾年,成日有人問我幾時可以載埋佢哋飛,當然,載靚女更好,2006年,我開始飛雙人,初初要哎人坐到後來好多人哎我,2009年正式考晒美國啲雙人牌,不過我喺飛行界,從來只有人害我,冇人幫我!不論裝備丶資格丶技術丶經驗,以雙人飛行計,我係香港最好,到今日為止,只並沒有發生過一次意外!其實都要多謝佢地,冇佢哋樣樣話我唔夠班,我都唔會一路再學上去!2013年正式考到教練牌,2017年升埋高級教練,係香港第一個,暫時係唯一一個!

Disclaimer

 

Any form of aviation is potentially dangerous. Paragliding is an inherent dangerous sport and contains risks and dangers that cannot be eliminated which may result in serious injury, permanent disability or death. We assume that those individuals who choose to participate in these sports are aware of the risks involved and are willing to accept the responsibility for their own actions and agree not to sue the instructor.